Mana isan’andro 24 Janoary 2022

Ny olona misaina dia mahita avy hatrany fa nisy namorona sy mitantana izao tontolo izao. Ny adala, na izay manao mafy loha tsotra izao, no miziriziry fa tsy misy Andriamanitra. Vokatr’izany dia sahy izy ireny manao asa ratsy izay tsy ankasitrahan’Andriamanitra (1) toy ny fisainana maloto sy feno fahalovana, ny fanararaotana ny mpandefitra sy ny ory (4, 6).

Mifanohitra amin’ny adala, ireo izay mino fa misy Andriamanitra. Nefa na dia miaiky izany aza ny ankamaroantsika dia mbola manao hadalana ihany. Tsy misy afaka milaza fa tsy mbola nanota na tsy nanao ratsy. Raha mba nisy tsara vita aza dia tsy ahafahana mirehareha satria noho ny fahasoavan’Andriamanitra no nahavitana izany fa tsy ny fahaizana na fahendrena manokana. Samy mpanota daholo manoloana ny fahamasinan’Andriamanitra. “Tsy misy marina na dia iray akory aza” (Romana 3.10). Samy mila ny famonjen’i Jesoa mba hanafaka amin’ny fahazaran-dratsy. Samy mila ny famelan-keloka vao afaka hifandray amin’Andriamanitra. Soa ihany fa efa nomen’ny Tompo ny vahaolana amin’ny fahotana, dia ny sorona nataon’i JesoaKristy teo amin’ny hazo fijaliana mba hanafaka ny helok’izay mandray Azy. “Fa samy efa nanota izy rehetra ka tsy manana ny voninahitra avy amin’Andriamanitra, nefa hamarinina maimaimpoana amin’ny fahasoavany izy noho ny fanavotana izay ao amin’i Kristy Jesoa”. (Romana 3. 23, 24)

Fiderana : Deraina ny Ray noho ny heviny tsy takatry ny saina, deraina Jesoa noho ny fitiavany nahafoizany ny ainy ho antsika.